Siulittaasoq: Nuuk Imermut aningaasaliinissaq pisariaqarpoq
![](/sites/default/files/styles/image_934x467/public/article_images/kuupik_kleist_klimaministeriet_klippet_0.jpg?itok=N_C2ZkZG)
Taama nalunaarneq sangoriataarneruvoq, tassami Nuuk Imeq aappaagu matussasoq suliffeqarfiup siulersuisuisa nalunaarutigisimagaluarpaat.
- Siullermik soorunami suliffeqarfik iluatinnartutut isigigatsigu, sulisunuinnaanngitsoq kisianni aamma nunatsinnut, siulersuisut siulittaasuat Kuupik V. Kleist ataasinngornermi Qanoruumi taama oqarpoq.
Suliffeqarfik ilumut ingerlaannassappat aningaasaliinissaq pisariaqartoq siulittaasup pingaartuunerarpaa, tamatuminngalu aalajangernissamut siulersuisut tunuliaqutaqarsimapput.
- Nutarterinissaq pisariaqavissorpoq, ilaatigut puiaasanut erruivissuup taarserneqarnissaa, immiorfiit aammalu Coca-Colakkut tamakkua piumasaqaataat eqqarsaatigalugit, Kuupik V. Kleist oqarpoq.
Suli nalorninartoq
Puiaasanut utertitseriaaseq qanoq ittuujumaarnersoq nalorninarmat atortunik nutaanik pisarsinissaq piginniittunut nalorninartoq, taamaammallu Nuuk Imeq matuneqassasoq, siulersuisuusimasut januarimi innersuussutigaat.
- Avatangiisinut naalakkersuisup 2013-imi avammut nalunaarutaa immiaaqqat imeruersaatillu kulsyretallit puuinik, tassunga ilanngullugit qillertuusat, utertinneqartarnerannik aaqqissuussineq atuutilersinneqartussatut ilimagineqartoq, Nuuk Imeq A/S-ip aningaasaliinissamut pilersaarutaanik unitsitsivoq.
AAMMA ATUARUK Sulisut Nuuk Imeq A/S-ip ammaannarnissaa nuannaarutigaat
Justus Hansen, Nuuk Imermi siulersuisuni siulittaasuunermini taama oqarpoq.
Massakkulli siulersuisut nutaamik siulittaasortaarmata nipi allanngorpoq.
Suliffeqarfiup sulisui 50-it missaanniittut nunatsinnilu avatangiisit suliffeqarfiup pingaartilluinnarai Kuupik V. Kleistip erseqqissaassutigaa.
Siulersuisut sunniiniaqataasut
Nuuk Imermut ingerlariaaseq iluaqutaasoq attatiinnarumallugu, suliffeqarfiullu matunnginnissaa anguniarlugu, siulersuisut nutaamik aningaasaliiniaatigalutik Naalakkersuisunut sunniiniaqataavoq.
- Soorunalimi sunniiniaqataavugut, taanna isertuunneqassanngilaq.
AAMMA ATUARUK Nuuk Imeq matunissaminnik tunuarteripput
Naak siulersuisut suliffeqarfik matuniarlugu aarlerisaarisimagaluartut Nuuk Imeq piginnittunut iluanaarutaalluartuuvoq.
Suliffeqarfik 2016-imi akileraareerluni 30,3 millionit koruuninik iluanaaruteqarsimavoq. Naatsorsuutit naapertorlugit piginnittut 52 million koruuninik agguagarsissasut siunnersuutigineqarpoq.
Nuuk Imeq Kommuneqarfik Sermersuumit, Royal Unibrewimit Carlsberg Breweriesimiillu pigineqarpoq.
AAMMA ATUARUK Nuuk Imeq sinneqartooruteqangaatsiartoq