"Nuuk Climate Days 2009" nunanit allanit soqutigineqaqaaq
Peqataasussat 160-init maanna amerlanerulerput, ilimagisamit marloriaammik amerlanerullutik, ataatsimeersuarnissamik aaqqissueqataasoq, Teknikkimullu tunngassuteqartunik Danmarkimi Universitetimi, immikkoortortaqarfimmi DTU Space-imi pisortaq, naalagaaffimmi nunamik uuttortaasartoq, Rene Forsberg, oqarpoq.
- Ataatsimeersuarnissamut inuit taama amerlatigisut nalunaarnerisa takutippaat, sila pillugu ilisimatusarnermut Kalaallit Nunaat qanoq pingaaruteqartiginersoq. Ilisimatusartorpassuit nunanit tamaneersut kalaallinik ilisimatusartunik oqartussaasunillu qanimut suleqateqarusunnerusut aamma malunnarpoq, soorlu Silap pissusaa pillugu Pinngortitaleriffimmi sullissivittaaq qanimut suleqatigerusunneqarpoq, Rene Forsberg oqarpoq.
Pingaartumik USA-mit peqataasussarpassuaqarpoq, kisianni Danmarkimiit, Kalaallit Nunaanniit Nunanillu Avannarlerniit peqataasussat saniatigut Tuluit Nunaanniit, Hollandimiit Tysklandimiillu aamma peqataasussarpassuaqarpoq.
Kalaallit Nunaanni Issittumilu silap pissusaata allanngoriartornera, tamatumalu siunissami malitsigisinnaasassai ilisimatusartut ataatsimeersuarnerminni nalilersussavaat.
Ataatsimeersuarneq marlunngorpat aggustip 25-anni tamanut ammarneqarpat, silap pissusaata Kalaallit Nunaanni Issittumilu allanngoriartornera sunniutaalu pillugit paasisat kingulliit ilisimatusartut paasisimannilluartullu saqqummiutissavaat.
"Nuuk Climate 2009" silap pissusaa pillugu Pinngortitaleriffimmi sullissivittaap, Danmarkimi silasiorfiup, DMI-p, aamma Teknikkimut tunngassuteqartunik Danmarkimi Universitetip, DTU Space-ip, ataatsimoorlutik aaqqissuussaraat.
