Nuuk AWG-mik aaqqissuisuujumavoq
2016-mi marsip qaammataa Nuuk pisoqarfiulaavissussagunarpoq tikeraat 2.000-it missaanniittut peqataasoralugit Arctic Winter Games ingerlanneqalerpat.
Nuuk aamma Namminersorlutik Oqartussat pisortatigoortumik qinnuteqarput Arctic Winter Games 2016 aaqqissuisuuffigiumallugu. Qinnuteqaat sapaatip akunnera kingulleq nassiunneqartoq naapertorlugu Nunavummi Iqaluit qanimut suleqatiginiarneqarput. Taamaattoq suleqatigiinneq taanna 2002-mi Arctic Winter Games avillugu aaqqissuussinertut annertutigissanngilaq.
- Qinnuteqaammi allapparput sukuutsertarfimmik sananissamik pilersaaruteqarata. Nunavummi naalakkersuisut Iqalunnilu kommunalbestyrelse oqaloqatigereerlugit siunnersuutigaarput sukuutserluni unamminerit Iqalunni ingerlanneqassasut, Nuummi Arctic Winter Games-eqarnissaannut qinnuteqaasiornermi Kommuneqarfik Sermersuup Namminersorlutillu Oqartussat ataqatigiissaarisuat William Kriegel KNR-imut oqarpoq.
Arctic Winter Games-imi oqartussat qullersaat tassalu nunani tamalaani ataatsimiititaliaq inassuteqarsimagaluarpoq nunarput aaqqissuisuulerpat sukuutsertarfimmik sanasoqassasoq.
- Erseqqissassavarput una qinnuteqaataannaagallarmat. Nunani tamalaani ataatsimiititaliap isummerfigisussaassavaa aaqqissuussat ilaasa Iqalunni pinissaat akuersaarniarnerlugu, William Kriegel oqarpoq.
- Ilanngullugu allapparput peqataasut tamarmik ammaanersiornermi naggataarnersiornermilu Nuummiinnissaat periarfissiuunneqassasoq, William Kriegel oqarpoq.
Qinnuteqaat naapertorlugu avataaniit peqataasut 2.000-it missaanniissapput ullunili sorlerni pinissaa suli aalajangersaqqissaarneqarani.
- Missingersuusiavut naapertorlugit aningaasartuutit 48 millioner koruunit missaanniissaapput. Namminersorlutik Oqartussallu aningaasartut qeqqatigut avinneqassapput. Aaqqissuussinermut atatillugu sulisussanik atorfinitsitsisoqassaaq. Taakku suliassaasa ilagissavaat aningaasaliisut namminersortut sapinngisamik amerlasut pissarsiarinissaat, William Kriegel oqarpoq.
Kulturimut Naalakkersuisoq Mimi Karlsen aamma Kommuneqarfik Sermersuumi borgmesterip tullersortaa Per Berthelsen angalaqataaniarput Arctic Winter Games marsip aallartilaarnerani Whitehorse-mi ingerlanneqalerpat. Pilersaarutaavoq Nunatta 2016-mi aaqqissuisuusinnaanera pillugu ataatsimiinnerit arlallit ingerlanneqarnissaat.
