Nuuk Arctic Winter Gamesimut allaffeqarfittaalerpoq
Amerlaqisut eqqaamassajunnarsivaat Nuummi kommunep allaffiata eqqaani venstre fængselimik taagorneqartup silaatani Arctic Winter Games 2002-p allagartarsua 2002-mi nivingammat. Maanna Arctic Winter Games Nuummi allaffeqarfittaaqqittussanngorpoq 2016-mi Nuummi Arctic Winter Gameseqarnissaanut piareersaanermi qitiusussamik.
Arctic Winter Gamesip 2016-mi Nuummi aaqqissuunneqarnissaanut isumaqatigiissut siorna Whitehorsemi atsioqatigiissutigineqarpoq maannalu Kommuneqarfik Sermersooq aamma Namminersorlutik Oqartussat aaqqissuisut ataatsimiititaliaannik pilersitsipput. Tassani borgmester Asii Chemnitz Narup siulittaasuuvoq ilaasortallu allat tassaapput naalakkersuisunut ilaasortaq Mimi Karlsen GA-llu siulittaasua Henrik Sørensen. Arctic Winter Gamesip nunani tamalaani ataatsimiititaliaani nunarput sinnerlugu ilaasortat Peter Frederik Lyberth aamma Mikael Kristensen ataatsimiititaliami aalajangeeqataasinnaanatik peqataatinneqassapput.
Januaari naatinnagu aqutsisussatut ataatsimiititaliaq pilersinneqassaaq tassanilu Namminersorlutik Oqartussat, Kommuneqarfik Sermersooq aamma inuussutissarsiornermik ingerlatallit peqataatinneqassapput.
Arctic Winter Games 2016-mi aaqqissuisuunissamik isumaqatigiissut malillugu akisussaaffigineqalerpoq timersuutini assigiinngitsuni 14-ni unammisitsinissaq sukuutserlunili unamminerit Iqalunni Nunavumi ingerlanneqassallutik.
Aappassaa nunarput Arctic Winter Gamesimik aaqqissuisuusussanngorpoq. Maannali suliassaq angineruvoq tassami aaqqissuussineq tamangajalluinnaat Nuummi isumagineqassammat 2002-mi Arctic Winter Gameseqarmat aaqqissuussinermik Iqaluit avitseqatigiiffigineqareersut.
Taamanikkut nammineq piumassutsimik ikiuuttut Nuummi 1.000-upput 2016-milu nammineq piumassutsimik ikiuuttut 1.400-ut missaat pisariaqartinneqassapput. Timersortartullu aqutsisuilu 1.500-ut missaanniittut Nuummut tikinnissaat naatsorsuutigineqartoq Claus Nielsen aamma 2002-mi Arctic Winter Gamesimi timersorluni unamminernut akisussaasoq nalunaarpoq.
