Nuuk: Sanaartornermik suliaqartut 60-it angerlartinneqartut

Nuup qiterpasissuani, kommunip allaffeqarfiata Ukaliusallu Atuarfiata akornanni, sanaartornerujussuaq ulluni makkunani uninngavoq.

Tamanna pissuteqarpoq Islandimiut sanaartornermik suliffeqarfiata, Istakip, atuarfiliorlutik sanaartortuusut, sulisuisa ilaat ataaseq covid-19-imik tunillatsissimammat.

Istakimi ingeniørit pisortaata Reynir Viðarssonip tamanna KNR-imut oqaatigaa.

Atuarfiliornermi sulisut katillutik 60-iupput, tamarmillu septembarip 23-ata tungaanut angerlartinneqarsimapput.

AAMMA ATUARUK Suliffeqarfiit marluk Nuummi atuarfissualiornissamut neqerooruteqarput

Ingeniørit pisortaata ilisimatitsissutigaa sulisut sinneri coronamik tunillatsissimanngitsut.

- Sulisut sinneri 59-it coronavirusimik tunillanneqarsimannginnerat paasineqarmat sanaartorfik kaajallallugu ungaluusalerlugu sanaartornerup nanginneqarsinnaanissaa Istakip oqartussanut qinnutigivaa, sanaartorneq nangissinnaajumallugu. Qinnuteqaalli taanna itigartitsissutigineqarpoq, Reynir Viðarsson oqarpoq.

Taamaakkaluartorli sanaartornermik suliaqartut 59-it angerlartinneqarnerat oqartussanit nalileqqinneqarsinnaanersoq Istakimit kissaatigineqarsimavoq.

- Taamaammat neriuutigaarput sanaartornermik suliaqarnerput septembarip 23-at sioqqullugu aallarteqqissinnaassallutigu, Reynir Viðarsson oqarpoq.