Nuuk 2016-mi umiarsualivittaassaaq

Nuup umiarsualivia maanna tattoqisaaffiuvoq taamaammat allineqarnissaa pisariaqalivissimavoq.

Umiarsualivik nutaaq ullumikkut umiarsualiviusup akinnguani Umiarsualiviup qeqertaanik taaneqartartuni sananeqartussatut pilersaarutaavoq.

Umiarsualiviup sananissaa pilersaarutaalereeraluartoq taamaattoq aningaasalersornissaanut tunngasut Inatsisatut isummerfigisussaavaat.

- Periarfissat marluupput. Siulleq tassaavoq 100 procentimik Namminersorlutik Oqartussanit pigineqartumik aktieselskabiliornissaq. Periarfissap aapparaa Kommuneqarfik  Sermersooq, Aalborgip umiarsualivia aamma Royal Arctic Line peqatigalugit suliap ingerlannissaa. Isumaqatigiinniarnerit naammassippata qanoq pisoqarnissaa paasinarsiumaarpoq, Jens B. Frederiksen oqarpoq.

Umiarsualiviup allinissaata aningaasalersornissaa pilersaarusiornissaalu pillugit inatsisartut aappaagu isummertussaapput.

Aappaagu aniningaasanut inatsisissaq sisamanngormat akuersissutigineqarmat 9,5 millioner koruunit  suliap piareersarnissaanut avatangiisinullu sunniutissai pillugit VVM-mik taaneqartartumik nalunaarusiornissamut aningaasaliissutigineqarput.

Pilersaarusiornissallu aappaagu aningaasanut inatsisissamut ilanngunneqarnera suliap ingerlariaqqinnissaanut pingaaruteqarluinnartoq Jens B. Frederiksen nassuiaavoq.

- Aningaasaliinitsigut qulakkeerparput suliap ingerlaqqinnissaa aammalu kinguaattoorfiunngitsumik ingerlanneqarnissaa, Jens B. Frederiksen oqarpoq.

Nuummi umiarsualivissaq 40.000 kvadratmeterisut angitigisussatut naatsorsuunneqarpoq.