Nutarterineq pissutigalugu raajalerineq unissaaq
Qangali pilersaarusiorneqareersimavoq, ukiullu qanoq ilinera aamma eqqumaffigineqareersimalluni, taamaakkaluartoq Ilulissani raajaleriffik annertuumik nutarterneqarneratigut sulisut 30-t juulip qaammataani angerlartinneqartussaassapput.
Allattoq Peter Troelsen, Simon Uldum
maajip 10-at 2013 08:26
Ilulissani raajaleriffik nutarterneqartussaammat raajarniat juulip qaammataa tamakkerlugu pisaminnik tulaassisinnaassanngillat. Tunisassianik assartuutinik, tunisassiorfiullu naqqinik iigaanillu taarsersuisoqartussaavoq. Matusigallarnissaq juulimi pisussatut aalajangiunneqarpoq qaammammi tassani raajat pitsaassusaat ajornerulaartarmat sulisullu ilaat aasaanerani sulinngiffeqartussaammata.
Raajanik tunisineq kingulleq pissaaq tallimanngornermi juunip 28-ani tunisassiornerlu kingulleq pissalluni sapaammi juunip 30-ani. Raajanik tulaassueqqittoqalissaaq sapaammi juulip 28-ani 2013 tunisassiornerlu juulip 29-ani nangeqqinneqassalluni. Qaleralinnik aalisakkanillu allanik tulaassuineq allanngortinneqassanngilaq.
