Nutaarmiut qinikkamik sinniisoqanngillat
Nunaqarfiit siulersuisuisa katitigaasarnerat 2009-mi allanngortinneqarmat nunaqarfiit ilaat pingasunik tallimanilluunniit ilaasortaqartalerput. Kullorsuup, Tasiusap Nutaarmiullu ataatsimut siulersuisussaannik tallimanik ilaasortaqartussamik qinersisussanngortoqarmat Nutaarmiumik qineqqussartoqaraluarpoq.
- Ajoraluartumilli qinigaanngitsoorpoq, Simon Sakariassen, nunaqarfiit aqutsisuisa siulittaasuat oqarpoq.
Nunaqarfiit siulersuisuini maannakkut ilaasortat tassaapput pingasut Tasiusameersut marlullu Kullorsuarmeersut.
Nutaarmiut Upernaviup nunaqarfittaani qulingiluaasuni inukinnerpaavoq 46-nik inoqarluni, Naatsorsueqqissartarfiup kisitsisaatai. Kullorsuaq inuttunerpaalluni 436-nik inoqarluni.
KANUKOKA´p nittartagaani allassimavoq Nutaarmiut tassaasoq ilinniarsimanngitsunik ilinniartitsisoqartoq, atuarfillu arfineq marlunnik atuartoqartoq. Qaasuitsup Kommuniata nittartagaani allassimasoqarpoq atuarfiup atuartut sisamat atuartorisinnaagai, 1 klassinit 7. klassi angullugu atuartoqarsinnaalluni.
