Nutaarmiormiut katersissuppaat
Suliniuteqartut ilaat Anine Mørch taama nassuiaavoq.
- Sulineq, aalisarneq piniarnerlu tamarmik unittoorsimapput, Anine Mørch Upernavimmiit oqaluttuarpoq.
Upernavik Nutaarmiuniit 91 kilometerinik kujasinnerusumiippoq, tassanilu ullut arfineq pingasut matuma siorna angutit inuusuttup inuit pingasut toquppai sisamallu toqoriaraluarlugit.
Pisorlu nunaqarfinnguami 50-it inulaarlugit inulimmi alianartoq pissutigalugu Upernavimmi katersuiniarneq aallartippoq
Ullut marluk matuma siorna aningaasanut nakkartitsiviit atorlugit Pilersuisup pisiniarfiani katersuiniarneq aallartippoq.
GrønlandsBankenimilu kontomik ikisiffigineqarsinnaasumik ullumi ammaapput. Tassungalu inuit ataasiakkaat kikkulluunniit, peqatigiiffiit suliffeqarfiillu qimagaasunut aningaasanik februaarip 29-iata tungaanut tunissuteqarsinnaapput. Upernavimmi nunaqarfinnilu taassuma eqqaaniittuni najugaqartut, tassunga kontomut ikisiniarunik akiliuteqaqqaassanngillat.
Anine Mørchip maluginiarpaa qimagaasunut tunniussiumasoqarlualereertoq ikiuukkusuttoqartorlu.
Nutaarmiuni qimagaasunut aningaasanik tunniussaqarusukkuit uunga kontomut ikisisinnaavutit: 6471 - 11 58 24 1.