Nutaamik pisortaqalerput

Royal Arctic Line-p piginneqataaffigisaa, Danmarkimi Aalborgimiittoq, Royal Arctic Logistics nutaamik pisortartaarpoq. 47-nik ukiulik, Lars Østergaard pisortanngorpoq. Taanna Color Printimi pisortaanertut ilaatigut atorfeqarsimavoq.
Allattoq Apollo Jeremiassen
novembarip 05-at 2012 10:55

Lars Østergaard nunat tamalaat suliffeqarfiisa aningaasarsiorneri pillugit cand.merc-itut ilinniarsimasuuvoq, suliffeqarfinnilu arlalinni pisortatut misilittagaqarluni, ilaatigut FL Schmidtip suliffeqarfissuisa ilaanni pisortaasimalluni.

- Lars Østergaardip pisortatut atorfinitsinneqarnerani Royal Arctic Logistics siuarsarneqassaaq, suleqataalernissaalu qilanaaraara, Royal Arctic Linep siulersuisuini siulittaasoq, Jens Andersen oqarpoq.

Lars Østergaard ingerlannartumik atuutilersumik sulilissaaq, aallaqqaammut suleqatigissallugu pisortatut tunuartoq, pisortaq Jesper Balthazar-Christensen.

Royal Arctic Logistics-ip suliarai Royal Arctic Line-p Danmarkimi soqutigisai ilaatigut nassiussat nunanilu assigiinngitsuni assartuussinerit. Royal Arctic Logistics aningaasanik 238 millionit koruuninik siorna kaaviiaartitaqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq