Nutaamik periusissiornikkut annaasaqarnissaq Binzerip aarleqqutigaa

Tele-mut uggornartupilussuuvoq, suliffeqarfiup Namminersorlutik Oqartussat pigisaata aatsitassarsiortoqartillugu attaveqaatitigut sullissinerata kisermaassiunnaarnissaa.

Nutaarsiassaq Tele-mut ajorpoq, Tele'p pisortaanera aamma isumaqarpoq nutaarsiassaq Kalaallit Nunaannut tamarmut ajortoq.

- Inuiaqatigiit eqqarsaatigalugit eqqasuuteqarpunga, aamma kalaallit inuiaqatigiit allamiunit aningaasarsiorfissaralui eqqarsaatigalugit. Pingaarutilittut isigaara kalaallinut inuiaqatigiinnut iluaqutissaammata suliniutit annertuut Kalaallit Nunaanni aallartinneqarnissaat. Tassalu nunani allamiut telemi attaveqaatinik suliaqalissappata atuisartunut kalaallinut iluaqusiinavianngitsut. Michael Binzer oqarpoq.

GA-mittaaq tusarniaanermut akissumminni erseqqissarpaat, paasisinnaanngilluinnaritsik sooq Namminersorlutik Oqartussat suliffeqarfiit pigisaat inatsisitigut aalajangiinikkut aatsitassarsiornermi salliutinneqannginneri.

Oqallisaajuaannarpoq unammilleqatigiinnerup akit appartittarai. Uanili taamaattoqarnissaa ilimaginngilara.

- Upperinngilarput maani niuerfik ima angitigisoq allaat unammillertoqarsinnaalluni. Attaveqatigiinnermut aaqqissuussineq Kalaallit Nunaanni pilersissallugu akisuupilussuuvoq, nuna angisoorsuugami inukeqalunilu. Tassalu taanna eqqarsaatigalugu ajorluinnartuuvoq. Kalaallinut inuiaqatigiinnut ajorpoq, kalaallinullu atuisunut ajorluni.

Binzerip ugguaraa, nunami allamiut telemi attaveqaatitigut ataqatigiinnermullu aaqqissuussinermi namminneq aaqqiissutissanik nutaanik eqqussissappata.
Suliniutit aningaasarpassuarnik aningaasaliiffigineqartariaqassapput piginnaasaat annertusineqassappata.

- Annertusaaneq taamaattoq Tele-Postimeersuuppat kalaallinut inuiaqatigiinnut iluaqutaassaaq. Akerlianit attaveqatigiinnermut atortut namminneq suliarissappatigit imaassinnaavoq kalaallinut inuiqatigiinnut iluaqutaanngitsoortut, Michael Binzer oqarpoq.