Nutaamik isumaqatigiissusioriartorput
Danmarkimi borgmesterit marluk Kalaallit Nunaannukarlutik ullumi aallarput kalaaliaqqat Danmarkimut atuariartortarnerat nutaamik isumaqatigiissusiorfigiartorlugu.
Isumaqatigiissummi nutaami qulakkeerneqarpoq meeqqat Ilulissaneersut Fredericiamut, Middelfartimut Børkopimullu atuariartortarnissaat, illoqarfiit taakku marluk illoqarfittut ikinngutigiipput.
Kalaallit meerartaat 2000-it Danmarkimut 1969-imiilli atuariartortarsimapput, meeqqallu 75-it angajoqqaarsiaqarlutik maanna atuarput.
Kommuneni aaqqissuussaanermik iluarsaasseqqittoqarluni Børkop aamma Middelfart kommuninut allanut kattussuummata kalaaliaqqanut Danmarkimut atuariartortartunut atatillugu nutaamik isumaqatigiissusiortoqartariaqarsimavoq.
Tamannalu tassa pillugu Fredericiap borgmesteria, Uffe Steiner Jensen, Børkopimilu borgmesteriusimasoq, Vejlep Kommuneani maanna borgmesteriusoq, Leif Skov, ullumikkut Kalaallit Nunaaliarput, suleqatigiinnissamik isumaqatigiissut nutaamik atsioriartorlugu.
