Nutaaliornerup iluani unammersuarnermi Kalaallit Nunaat unammeqataavoq
Niuernermik Ilinniarfimmi ilinniartut marluk Aviaja Saralu "INULIK"-mmik taallugu isumassarsiaq aqqutigalugu Naalagaaffeqatigiit nutaaliornikkut Københavnimi unammisinneqarnissaanni peqataassapput, Aviaja Saralu Nuuk Centerimi unammisitsinermi "Arsarnerit Inuusuttai - Young Northern Lights"-imi siorna decembarimi ajugaapput, nutaaliornermillu Københavnimi Industriens Husimi unamminissamut ullumi peqataasussanngorlutik.
Maluginiutit atorlugit paasisaqarnerunissaq
Maluginiutitta atorneqarnerunissaat "INULIK"-mmi anguniarneqarpoq, innuttaasut takornariallu kalaallit kulturiat pillugu paasisaqarnerulernissaat ilaatigut anguniagaalluni. Sara Leander, Nutaaliornerup iluani unammisitsinermut peqataasoq oqarpoq:
- Isumassarsiarput imaalerpoq: Maluginiutigut atorlugit Inuit kulturiat saqqummersissallugu. Pissutigalugu maluginiutigut atuleraangatsigit eqqaamasavut eqqaamajuminarnerulertaramik, Sara Leander, Nutaaliornerup iluani Københavnimi unammisitsinermi peqataasoq oqarpoq.
Kunngissaq aqqusaarpoq
Nunarput sinnerlugu Københavnimi Industriens Husimi unammisitsinermi peqataasut Kunngissaq Frederimmit statsministerimiillu aqqusaarneqarput, kunngissallu kalaallit peqataasut isumassarsiaat isumassarsiatsialattut taavaa.
Kunngissallu Kalaallit Nunaannik ilisimasaqarluarnera Sara Leanderip nuannaraa:
- Pissatsinarpoq. Nalunnginnamiuk Kalaallit Nunaat qanoq ittuusoq. Nalunngilara Kalaallit Nunaat aamma nuannarisorujussuugaa, taamaammat aamma oqaluttualaarpoq Tunu pillugu, taavalu orpikkat pillugit oqarneq ajuleratta ingerlaannaq naqqippaatigut, Sara Leander oqarpoq.
Tuluttut pikkorissartoqassaaq
Københavnimi unammersuarnermi ajugaasut Europami pissartanngorniunnernut, Frankrigimi ukioq manna juulimi pisussanut ingerlaqqissapput.
Sara Leanderip Aviajallu isumassarsiaat suli ineriartortinneqarsinnaagunaraluartoq, peqataasut marluk taakku taamaaliornissamut piareersimasut, ilinniartitsisuata Susanne Bisgaard Rasmussenip qularutiginngilaa:
- Taamaassappat taava english is my bestimik pikkorissaasariaqassaagut, tuluttut pikkorissarneqartariaqassallutik, kisianni taamanikkussamut taava taamaaliortariaqassaagut, ilaa, Susanne Bisgaard Rasmussen, ilinniartuutini oqarfigai, anngaappullu.
Sara Leanderili Aviaja Paviasenilu Industriens Husimi unammisitsinermi finalimut anngutinngitsoorput.
