Nutaaliorfimmut sipaarnialerneq pissusissamisoorsorinngilaa

Nutaaliorfiulli Namminersornerullutik Oqartussanit aningaasaliiffigineqarnera januaarip aallaqqaataaniit millioni koruuninik ikilisaavigineqarpoq, Nutaaliorfillu juunimi matuneqarnissaa aarleqqutigineqarpoq. Nutaaliorfiup pisortaa Jørgen Peter Labansen tamanna pillugu ima oqarpoq:

- Pisortatigoortumik sulisoqarnata januaarip aallaqqaataaninngaanniit suliffeqarfik ingerlavoq, attartuinermut akiligassaq taamaallaat akilerneqartarluni. Namminersornerullutik Oqartussat oqariartuutaannut naapertuutinngilaq, taakkummi oqarmata CO2-mik aniatitsineq annikillisarneqartariaqartoq. Uagut suliavut avatangiisinik mingutsaaliuinermut attuumassuteqarluinnarput, Jørgen Peter Labansen oqarpoq, nangipporlu:

- CO2-mik nunatsinni aniatitsinermik annikillisaataasinnaasut suliniutit assigiinngitsut ingerlakkaluarpavut. Taakku annikillisaanissamut iluaqutaasinnaagaluarput, taamaammat aningaasaliinerit ikilisarneqarnerat pissusissamisuunngillat, Jørgen Peter Labansen oqarpoq.

Nutaaliorfimmi pisortaq Jørgen Peter Labansen taama oqarpoq.

Inuussutissarsiornermut suliffeqarnermullu naalakkersuisoq Siverth K. Heilmann siornatigut oqareerpoq aningaasat nutaaliornernut atorneqaratik, Nutaaliorfiup ingerlanneqarnerannut atuinnarneqartartut.

Tamannali Jørgen Peter Labansenimit illuatungilerneqarpoq, aningaasat affaat nutaaliornermut atorneqartartut oqaatigalugu.