Nusukap Royal Greenland kalaallimik pisortaqaqquaa

- Nusukamiit tupaallatsitaangaarpugut pisortassaq ippassaq tusarliunneqarmat, tassami allagarsiussamik aviisitsinni allatigulluunniit Nusuka takunngilaq, naak-una ileqqorissaarneq? Kattuffimmi siulittaasoq Gerth B. Lynge oqarpoq.

Taamaammat Kattuffiup piumasaraa sulisussarsiornerit ammasumik ingerlanneqarnissaat.

- Suliffeqarfissuaq nunatsinnut taamak pingaaruteqartigisoq Nunatsinni ”takornariamit” aqunneqartariaqanngilaq, aqunneqartariaqarlunili nunatsinni pissutsinut ilisimasaqartumik. Tassami aalisarnermut aalisakkanillu nioqqutissiornermi malinnaasut tamarmik nalunngilaat, Royal Greenland A/S-p pileqqaaramili sanngiiffiisa annersarigaat, Kalaallit Nunaanni aalisartunik oqaloqateqarsinnaanngitsunik pisortaqartarnini, allaat tunisisartuni kalaallit aalisartut oqaasii atorsinnaanagit, nangippoq.

Nusukap aamma piumasaraa, Namminersorlutik Oqartussat ingerlatseqatigiiffinni siulersuisoqarnermut allattoqarfiat suleqqullugu, aqutsisut kalaallinik inuttalernissaat anguneqarniassammat.

Royal Greenlandimi siulersuisuni siulittaasoq Niels de Coninck-Smith aamma siulittaasup tullia Sven Lyse oqaaseqartinniaraluaratsigit iluatsitsinngilagut.