NUSUKA-p siunnersuutaa GA-mit isumaqatigineqanngilaq
Suliffeqarfiit nunatsinni angerlarsimaffillit suliarinnittussarsiuussisoqarnerani salliutinneqartalernissaannik Nunatsinni Suliffiutillit Kattuffiat NUSUKA-p naalakkersuisunut anguniaqqullugu siunnersuuteqarnerat, Kalaallit Nunaanni Sulisitsisut Peqatigiiffiata GA-p isumaqatiginngilaa. GA-mi pisortaq Ole Rud oqarpoq allannguinissaq pisariaqanngitsoq.
-Isumaqarpunga nunaqavissut suliffiutillit kikkut pineqarnersut misissorneqaqqaartariaqartoq. Nunatsinni kikkut sulisinnaanersut pillugit maleruagassaqareerpoq, tassanilu piumasarineqarpoq sulisinnaassagaanni nunatsinni angerlarsimaffeqartariaqarneq, Ole Rud oqarpoq.
NUSUKA-p siunnersuuteqarnerminut tunngavilersuutitut taavaa, suliffimmik nutaamik aallartitsisut 60 procentiisa matuinnartarnerat. Tamannali sumiluunniit pisarmat takornartaanngitsoq, Ole Rud oqarpoq, suliffeqarfiit aningaasaateqalereersut unammilleruminaassinnaasarmata.
-Suliffeqarfissuit nunanit allaneersut nunatsinni suliassat annerit pineq ajorpaat, piginneqatigiiffigisaasali nunatsinni angerlarsimaffeqartut suliassat pisarlugit. Tamannalu pisariaqarpoq suliffeqarfiit nutaat aallarteqqammersut aningaasaataat sillimmasiinissamut naammanneq ajormata. Suliffeqarfiit minnerit suliassat annerit soorlu mittarfiliornerit, imermik nukissiorfiliornerit suliassallu allat angisuut kivissinnaanngilaat, Ole Rud oqarpoq.
NUSUKA-lli suleqatigiissitamik pilersitsisoqarnissaanik siunnersuuteqarnera GA-mit soqutigineqarpoq.
Suliffeqarfissuit angisuut ilinniartuuteqarumanngittarnerannik oqariartuut GA-mit misissorusunneqarpoq, ilumuussappallu suleqatigiissitap siunnersuut suliarileruniuk suliffeqarfinnut avataaneersunut piumasarisinnaavaa, nunatsinni suliaqarnermi ilinniartuuteqartarnissaq, Ole Rud naggasiivoq.
NUSUKA-p siunnersuuteqarnera Demokraatinit kisimi qisuariarfigineqarpoq, taakkulu siunnersuut isumaqatiginngilaat. Politikkikkut oqaaseqartartoq Palle Christiansen oqarpoq sulisussarsiuussisarneq kinaassusersiortoq aqqutissaanngitsoq. Sulisussarsiuussinermi maleruagassat assigiinngisitsinngitsut akit taamaallaat appasitsissinnaavaat, Palle Christiansen oqarpoq.
