NuSuKa-p Demokraatit tapersersorpai
Namminersornerullutik Oqartussat illuutaannik nalikilliliisarnermut tunngatillugu Demokraatit misissuisitsiniarput, Demokraatillu Nunaqavissut Suliffiutillit Kattuffiannit NuSuKa-mit taperserneqarlutik.
NuSuKa-p pisortaa Ole Aggo Markussen ima oqarpoq:
- Assigiinngisitsisoqarsimassappat pisariaqartipparput qulaajaasoqarnissaq. Innuttaasut tamarmik assigiimmik periarfissaqartinneqarnissaat pingaartorujussuuvoq, Ole Aggo Markussen oqarpoq, nangipporlu:
- Siunnersuut Inatsartuni akuersissutigineqassanngippat isumaqarpunga Inatsisartut annertuumik ajornartorsiuteqalissasut, inuiaqatigiit akornatsinni isumaqaqqajaanarsissammat toqqorterisoqarniartoq. Naalakkersuisullu siunnersuummut tapersersuissanngippata ilungersunartutut tigussavara. Oqareernittuut eqqarsaqqajaanarsissammat ajortuliaq matoorniarneqartoq, Ole Aggo Markussen oqarpoq.
Misissuisitsinissamut pisussaaffiliisinnaassutsimut tunngatillugu siunnersuut Inatsisartuni ullumi oqaluuserineqassaaq.