NuSuKa: Nunaqavissut suliffiutaat salliutinneqarlik

Suliariumannittussarsiuussinermi kalaallit suliffeqarfiutaat periarfissagissaarnerusinnaanersut suleqatigiissitaliamit misissorneqalerpoq.

Aningaasatit, isumalluutit piginnaasallu nunatsinniiginnarnissaat qulakkeerniarneqarput.

Suleqatigiissitaliaq suliariumannittussarsiuussinermut inatsimmik misissuisussaq Nunaqavissut Suliffiutillit Kattuffiata, NuSuKa-p kajumissaarineratigut Ineqarnermut, attaveqatigiinnermut, aatsitassanullu naalakkersuisumit Jørgen Wæver Johansenimit pilersitaavoq.

Nunavumi pissutsit atuuttut tunuliaqutaralugit NuSuKa taama isumassarsisimavoq. Nunavumi suliariumannittussarsiuussisoqaraangat Nunavumiut suliffeqarfiutaat salliutinneqartarput.

Siunnersuut annertunerusumik tapersersorneqarsimanngikkaluarpoq, suleqatigiissitaliamillu pilersitsisoqarneratigut suliaq maanna ingerlasinnaanngussaaq.

- Kissaatigaara suleqatigiissitaliap suliaasa inernerat inatsisissamik siunnersuuteqarnermik kinguneqarumaartoq, Inatsisartut 2007-imi upernaakkut ataatsimiinnissaannut saqqummiunneqarsinnaasumik, Jørgen Wæver Johansen oqarpoq.

Suleqatigiissitaliaq Namminersornerullutik Oqartussani Pisortaqarfinnit arlalinnit inuttalerneqarsimavoq, kommunillu KANUKOKA aqqutigalugu ilaasortaatitaqarlutik.

Unammilleqatigiinnermut ataatsimiititaliaq, Sulisitsisut Kattuffiat, GA, Sulisitsisut Kattuffiat ILIK, SIK kiisalu Sanaartornermik Ilinniarfik aamma ilaasortaatitaqarlutik.

Suleqatigiissitaq ukioq manna septembarip 26-ianni siullermeerluni ataatsimiissaaq.