NUSUKA ilaasortaqarnerujumavoq
NUSUKA-mi ilaasortat ataatsimeersuareernerisa kingorna, kattuffiup ilaasortaqarnerminut malittarisassaatini allanngortippai.
Nunami suliffiutillit kisimik kattuffimmut ilaasortaasinnaanerat atorunnaarsinneqarpoq, imaanilu inuussutissarsiortut ilaasortanngorsinnaanerat ammaanneqarluni.
Nunaqavissut suliffiutillit kattuffianni malittarisassat sooq allanngortinneqarnersut, siulersuisuni siulittaasoq Gerth Lynge, aperaarigatsinni, ima akivoq:
- Nunami inuussutissarsiortuunngitsunit saaffigineqartarsimavugut, namminerlu uparuarsimallutigu malittarisassatsinni taamatut ikkusimasoqarmat, Gerth Lynge oqarpoq.
Malittarisassat allanngortinneqarnerisa kingunerisaanik, suliffiutillit mattusimaneqarsimasut maanna ammaanneqarput.
- Saaffiginninnikuungaluartut maanna saaffiginneqqinnissaat maannakut utaqqimaassuagut, isumaqatigiinninniarnerillu nalilerumaarpaat kingorna pisussat, Gerth Lynge, NUSUKA-mi siulersuisuni siulittaasoq oqarpoq.
