Nunavut: Inuit qaffasinnerumik atorfeqalernissaat aqqutissiuunniarneqartoq

Nunavut pilersinneqarneranit ukiut 16-it qaangiunnerini naggueqatigiit Inuit inuiaallu allat inuussutissarsiutinik ingerlaqartuni pisortallu allaffissornerini qaffasinnerusumik, taamatullu akissarsiatigut atugarissaarfiusunik, atorfeqartitaanerat suli nikingasupilussuuvoq.

Kisitsisitigut paasissutissat naapertorlugit atorfiit qaffasinnerusut inuiannit allaneersunit inuttalersorneqarpallaarput.

Canadamili naalakkersuisut tamanna Nunavut Arctic Collegemut, Nunavummi sumiiffinni arlalinni immikkoortortaqarfeqartumut, tapiissuteqartarnikkut nutaamik aaqqissuussinikkut iliuuseqarfiginialerpaat.

Nunavummi inatsisartunut ilaasortaq Canadallu naalakkersuisuini Canadap avannaani piorsaanermut naalakkersuisoq Leona Aglukkaq taama ilisimatitsivoq.

Nutaamik suliniuteqarnikkut naggueqatigiit inuit atorfiit qaffasinnerusut angunissaannut pisariaqartumik piginnaasaqalersinniarneqassapput.

Naalakkersuisoq Leona Aglukkaq tusagassiorfinnut nalunaaruteqarluni allappoq Canadami naalakkersuisut suliniutaat tulluusimaarutigalugu, taamaaliornikkut naggueqatigiit inuit inuusuttaat Canadap avannaani aningaasarsiornikkut ineriarttortitsinermi annertusiartuinnartumi tamakkiisumik peqataanissaminnut ilinniartitaalernissaat sungiusarneqarnissaallu anguneqarsinnaassammat.