Nunavut attavigissinerussaaq
TV-kkut, oqarasuaatikkut internetsikkullu sivisuumik attavilussimapput. Nunavummi nunaqarfippassuarni internetsi arriitsurarsuunngikkunni ilaatigut attaveqanngivittarpoq.
Attaveqaqatigiinnermulli suliffeqarfiup, Northwestelip, tamanna maanna iliuuseqarfiginialerpaa. 250 millionit koruunit missaannik ukiuni tulliuttuni tallimani aningaasaliiniarpoq. Aningaasat Nunavummi attaveqaatit pitsanngorsarnissaannut taamaallaat atorneqassapput.
Northwestelimi pisortaaneq, Paul Flaherty, nutaarsiassaqartitsivimmut CBC Northimut oqarpoq, internetsikkut attaveqaatit sukkatsinnerussasut assiliartagissaarnerulissallutillu, oqarasuaatillu angallattakkat, soorlu Blackberries aamma Iphones, sumiluunniit atorneqarsinnaalissallutik.
TV-kkut aamma internetsertoqarsinnaalissaaq, nunavummiullu naggueqatitik Inuit, nunani allaniittut, taamaalillutik attaveqarfigisinnaalissavaat.