AWG2016 Nunavummiut tikeraarnertik nuannarilluinnarpaat
- Kalaallit Nunaannut pilluni misigisaq tupinnaqaaq, inuppassuarnillu nutaanik naapitsilluni. Aamma Nuuk alutornaqaaq, Kierstin Williams, 13-inik ukiulik, Iqalunninngaanneersoq Nunavummiuniillu Futsalimi unammiuaariaqataasoq oqarpoq.
Unammiat 300-t missaanniittut nunanit assigiinngitsunit arfineq-pingasuneersut Ukaliusami najugaqarput. Amerlammatalu piareersagassat arlaliusimapput, namminnerlu kajumissutsiminnik suliallit piffissami sivikitsuinnarmi aaqqissuisimallutik: Atuartitsiviit imaarlugit, atuarfik torersarlugu siniffiillu katiterlugit.
Ikinngutit nutaat
Kierstin Williamsillu unammiaqatini arfineq-pingasuusut atuartitsivimmi sinittarfeqatigai. Taakkulu ineqarfitsik iluarisimaarpaat.
- Nuannersorujussuuvoq unammiaqatikka ineqatigalugit, immitsinnut ilikkaraluttuinnarpugut, ikinngutitaartorluta ikasartuartarlutalu, aamma inerput wifi-eqanngikkaluartoq nuannareqaarput, Kiersten Williams qungujulalluni oqaluttuarpoq, nangillunilu;
- Aamma oqaatsit atorneqartut Nunavummiut oqaasiinut assinguneri tupigusuutigaarput, soorlu oqaaseq "assut", kalaallit illersuillutik ullumi atugaat.
Unammiat ineqarnissaasa saniatigut nerisassaqarnissaq aamma isumagisassani pingaarnerpaat ilagaat. Niviarsissallu nerilluarsimapput. Ullaap tungaani sandwichinik, iipilinik, yoghurtinik cupcakesinillu nerisaqartinneqarput, taakkullu mamarilluinnarpaat.
Issittormiut unammiuaarnerisa aallartinneranni Kalaallit Nunavummiullu niviarsiarartaat Futsalimik ullaap tungaa unammimmata, Nunavut 1-3-mik ajorsarpoq.
