Nunavummiut sulilersinnaanngortinniarlugit aningaasaliisoqarpoq
Nunavummi suliffissarpassuaqarpoq inuttassaqanngitsunik. Tamanna imminut akerlilersortutut ippoq, tassami aamma suliffissaaleqisorpassuaqarmat.
Sumiiffinni amerlasuuni, ingammik nunaqarfinni suliffissaaleqisut amerlaqaat. Taamaanneranut ilaatigut pissutaavoq suliffissaaleqisut tamakkua suliffinnut inuttassarsiorneqartunut naammattunik piginnaaneqartannginnerat ilinniarsimannginneralluunniit. Matumani ilaatigut pineqarlutik allaffimmiut, sanasut imaluunniit innaallagisserisut.
Canadami naalakkersuisut aningaasarsiornermut pilersaarutiminnut atatillugu Nunavummut 30 millionit koruuninik aningaasaliissuteqarput. Aningaasat tamaani suliffissaaleqisut ilinniartinneqarnerinut atorneqassapput, taamaalilluni Canadap kujasinnerusuaniit suliartortunik pisariaqartitsineq minnerulerniassammat.
