Nunavummiut piniarnerusariaqarput
Nunavummiut ilarpassui naammattunik nerisassaqarneq ajorput, pisiniarfinnilu nerisassanut akisoorujussuarnut naammattunik akissaqassanatik. Nunaqarfinni minnerusuni ajornartorsiut anneruvoq.
Nunavummiut piniarnermik maannamit annerusumik ingerlatsisariaqartut, arlalippassuarnit siunnersuutigineqarpoq.
Eva Aariak, Nunavummi naalakkersuisut siulittaasuat aamma naggueqatigiit Inuit siuttuisa ilaat Mary Simon marluullutik oqaaseqarput, Nunavummiut qangaaniilli nerisartakkaminnik nerinerusariaqalersut. Tassa piniarnermik aallussinerusariaqalersut.
Nunavummi nunap ilaani tuttut ikileriarsimapput. Taamaattumik Nunavummiut piniagassanik allanik piniartaqqullugit kajumissaarneqarput, tassa tuttut saniatigut, umimmannik, nerlernik ukallinik aamma tuttorujussuarnik piniartarnissaat kajumissaarutigineqarluni. Uumasut tamakku immaqa aamma ikileriarsimagaluartut, pinngortitalerisut nutaanik suli kisitsisaateqanngillat.
Tamatumunnga peqatigitillugu piniarnermi pisarineqartartut amerlanerusunut siammarneqartarnissaat, ingammik utoqqarnut allanullu piniariarsinnaanngitsunut agguaanneqartarnissaat, naalakkersuisut illoqarfinnilu peqatigiiffiit ikiorsiullugit isumaginiarneqarpoq.