Nunavummiut Kalaallit Nunaannik nersualaarinnipput

Meeqqat marluk Iqalunni eqqaaviit tunuanni sinittut Canadami aviisit annersaasa ilaanni The Globe and Mailimi ippassaq takuneqarsinnaapput, aviisili The Globe and Mail Kalaallit Nunaannik aamma nersualaarinnippoq.
Allattoq Mads Lynge
aggustip 16-at 2009 15:57

Meeqqat Iqalunni eqqaaviit tunuanni sinnguttut pillugit Canadami oqallittoqangaatsiartoq, KNR-ip Canadamiit tusagassiisartuata Marianne Stenbækip ippassaq tusagassiissutigaa.

Asseq The Globe and Mailimi ippassaq takutinneqartoq oqaluttuassartaqarpoq.

Assimi takuneqarsinnaasut pillugit oqallinnermi Kalaallit Nunaat nersualaarneqarpoq. Naak Iqaluit Kalaallit Nunaatalu akornanni 800 kilometeriinnaagaluartoq, pissutsit assigiinngitsorujussuusut The Globe and Mailimi allaaserineqarpoq.

Inuusuttut Kalaallit Nunaanni sukumiinerusumik sullinneqarnerisigut imminortarnerit ikilisinneqarsimanerat Canadami oqallisigineqarpoq, Nunavummi imminortarnerit amerlavallaarsorineqarput, akiorniarneqarnerannilu Kalaallit Nunaanniit isumassarsiortoqarnissaa innersuussutigineqarpoq.

Kalaallit Nunaanni aningaasarsiornerup ineriartornera nersualaarneqarpoq, soorlu aamma aalisarneq umiarsualiviillu pitsaassusaat nersualaarneqartut.

Tamakkua Nunavummi iluamik suli ineriartortinneqarsimanngillat, ilinniartitaanerullu pitsaassusaa aamma taakkartorneqarluni.

Nunatsinni Ilisimatusarfeqarpoq, Nunavummi tamanna aatsaat aallartisarneqaleruttorluni.

Kalaallit Nunaata namminersulernermigut pisuussutit uumaatsut nammineq aqutarilermagit Nunavummiunit nersualaarneqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq