Nunavummi suiaqatinoortut assigiinngisitsisoqarnera akerlilersorpaat
Sotjimi olympiadertoqarneranut atatillugu assortuunneq aallartippoq. Tamatumami nalaani Ruslandimi suiaqatinoortut taperserniarlugit Canadap ilaani Nunavummi illoqarfimmi Iqalunni illoqarfiup pisortaasa allaffianni erfalasoq neriusaatut qalipaatilik amuneqarpoq.
Simon Nattaq, Iqalunni illoqarfiup siulersuisuinut ilaasortaq, erfalasuliisoqarnera isumaqatiginagu tusagassiortunut oqarpoq 'suiaqatigisanoortuuneq naggueqatigiit inuit ileqqorinngikkaat'.
Taannalu Inuit suliniaqatigiiffiata Nunavut Tunngavik Inc.-p pisortaanit Cathy Towtongiemit isumaqatigineqarpoq.
Tamannalu pissutigalugu suiaqatinoortoq Kuujjuarmiu Robbie Watt, akerliuniaqatigiiffimmik pilersitsisimavoq.
- Tamatta naggueqatigiiuvugut inuit. Ilaqutariippugut, uanga illaruaataanianngilanga. Tamatta naligiippugut, CBC Northimut oqarpoq.
Robbie Watt Nunavummi naggueqatigiit inuit akornanni ilisarisimaneqartuuvoq, Inuit Tapiriit Kanatamimut siuttussatut 2012-imi qinigassanngortissimagami aammalu naggueqatigiit inuit pisinnaatitaaffiinik siuarsaaniarnermik suliniutinut arlalinnut peqataasimalluni, ilaatigut Canadami Ilumoortoq Saammaasseqatigiinnissarlu pillugit ataatsimiititaliaq peqataaffigisimallugu.
Robbie Watt Facebookimi qupperniliorsimavoq, piffissap sivikitsup ingerlanerani 700-nik taperserneqarsimasumik.
Aammattaaq kinaassutsiminnik isertortut kaaginik neriusaap qalipaataanik pinnersakkanik Nunavut Tunngavik Inc.-p Iqalunni allaffianut tunissuteqarsimasut, CBC taama allappoq.
