Nunavummi sakialluummik tb-mik nappaalapput

Nunavut 1999-imi pilersinneqarmalli aatsaat taamak tb-mik nappaalasoqartigisoq, Nunatsiaq Onlinep nittartagaani allaaserineqarpoq.

Ukiormanna januaarimiit sakialluummik tb-mik napparsimasut 81-it Nunavummi peqqinnissamik isumaginnittut nalunaarsorsimavaat. Taakku amerlanersaat Iqalunneersuullutillu Kinngaanneersuuput, tassa Qeqertaalummi Cape Dorsetimeersuupput.

Nunavummi sakialluummik tb-mik napparsimasut 81-iusut, 2008-mi nalunaarsorneqarsimasut amerlanerpaaffiat 58-iusoq maanna qaangerpaat.

- Ingammik inuusuttut 15-it 24-llu akornanni ukiullit nappaammit eqqugaapput, Nunavummi peqqinnissamut oqartussanut pisortap tullia Geraldine Osborne oqarpoq.

Taassuma ilanngullugu oqaatigaa, sakialluummik tb-mik napparsimasut 2003-mit amerliartorusaaginnavissimasut.

Nappaatip tuniluuffiginerusinnaasaanni, soorlu unnuisarfinni parnaarussivinnilu, Nunavummi oqartussat qinnguartaallutik misissuisarput.