Nunavummi politikeri: Persuarsiutissaqanngilaq
John Amagoalik, Nunavut ataataanik taaneqartaraluartoq, aviisimi Toronto Starimi oqarpoq Nunavummi maanna ingerlaneq taamani takorluukkaminnit ungasissorujussuaq.
Nunavummi ullumikkut suliffissaaleqisorpassuaqarpoq, inunnik isumaginninnikkut piujuartunik ajornartorsiortoqarpoq, inissiat Canadami tamanit ajornerpaallutik, peqqinnissaqarfik sussaanngilaq, ilinniartitsiniaraluarnerlu kukkusoorsimammat Nunavummi inuusuttut sisamararterutaannaat ilinniagaqarput, John Amagoalik Nunavuup ukiunik qulinngortorsiornerani allappoq.
Allakkamini anguniakkat qatangiinnarnerannut Ottawami naalakkersuisut pisuutippai.
- Naggueqatigiit Inuit ilinniagaqartinnissaannut akisussaaffitsik qimarratigiinnarsimavaat, atorfilittatik avammut kujammullu asuli angalateqattaarlugit, suleqatigiinnissaq ineriartortitsinissarlu eqqartorlugit, tamakkuali tamarmik piviusunik tunngavissaqanngillat, John Amagoalik Canadami naalakkersuisunut puffassimaarluni allappoq.
