Nunavummi peqqinnissaqarfiup nunarput suleqatigisinnaagaluarpaa

Canadap avannarpasinnerusortaani peqqinnissamik isumaginnittut, Canadap kujasinnerusortaanut isumalluuteqaratik, Nunatsinni peqqinnissamik isumaginnittunik suleqateqarsinnaagaluarput.

- Assersuutigalugu Nunavummi peqqinnissamik isumaginnittoqarfiup Canadap kujasinnerusortaani peqqinnissamik isumaginnittut ilaatigut isumalluutigaa, aqutsinikkut katsorsaanikkullu suliniutit tassanngaanneersut isumalluutigalugit. Nunavummi peqqinnissaqarfimmi misilittakkatut ittut atorneqaratik. Tamanna uggornarpoq, nakorsat Kue Young aamma Susan Chatwood, CBC Newsimut oqarput.

Pinaveersaartitsinikkut misilittakkat ilisimatuussutsikkullu misilittakkat Kalaallit Nunaanneersut atorneqarsinnaagaluartut nakorsat taakku marluk isumaqarput:

- Nuummi peqqinnissamik isumaginnittut naggueqatigiit Inuit Iqalunniittut iluaqutiginerusinnaagaluarpaat, Ottawami misilittakkat pinnagit, nakorsat taakku Canadian Medical Journalimi ilaatigut taama allaaserisaqarput.

Canadami oqartussat Nunavummi peqqinnissamik isumaginnittunut aningaasartuuteqangaatsiartarput, aningaasartuutigineqartulli Nunavummi innuttaasunut ataatsimut isigalugu iluaqutaavallaarneq ajortut oqaatigineqarluni.

Kalaallit Nunaanni, Nunanilu Avannarlerni misilittakkat tunngavigalugit pilersaarusiortoqartuugaluarpat Ottawami Torontomilu misilittakkat isumalluutigineqartariaqassanngikkaluartut, ilisimatusartut oqaatigaat, Canadamilu oqartussat Issittumi Siunnersuisoqatigiit ilaatigut suleqatigalugit Nunavummi peqqinnissaqarfimmik pitsanngorsaasinnaanerat tikkuarneqarluni.