Nunavummi nukappiaq saavitaasoq annaanneqarpoq

Nukappiaq inuusuttuaraq Nunavummeersoq sikutarujussuarmi saavitaasoq, sapaatip akunnerata naanerani annaanneqarpoq.
Allattoq Elisa Isaksen
novembarip 10-at 2009 06:45

Saavitaanermini sikutarujussuarmeeqatigisimallugit nanoq marlunnik piaralik. BBC-mi tamanna oqaluttuarineqarpoq.

Nukappiaq 17-inik ukiulik piniartumik utoqqasaamik aappaqarluni ungasissumut, Tasiusarsuup Hudson Bayip avannarpasinnerusuanut, piniariartillutik qamuteralaa ingerlaqqinneq sapilersimavoq. Nukappiaq pisummik ingerlaqqisimavoq piniariaqatigisani naapinniarsaralugu. Taamaalisorlu siku aserortilersimavoq, sikutarsuarmilu saavigussaalluni.

Malugilersimavaa, nanoq marlunnik piaralik sikutameeqatigalugu. BBC-mit oqaatigineqarpoq nukappissap imminut illersorniarluni nanoq inersimasoq aallaasariaqarsimagaa, ippassarlu ullaakkut ujaasisunit qulimiguulimmit takuneqarallartilluni annaanneqarpoq.

Taamaalinerani sikutaq Tasiusarsuarmi 7 kilometerinik ungasissusilimmut tissukareersimavoq, nukappissallu aallarfianit 45 kilometerinik ungasissusilimmiilluni.

- Nukappiaq 20 gradinik issittumi sikutami unnuereernermi kingorna qerussornerminik maanna ikiorneqartoq, canadamiut annaassiniartartuineersup, Kaptajn Michael Youngip, oqaatigaa.

Nukappissap pisaa - nanoq - qanoq pineqarsimanersoq oqaatigineqanngilaq. Nannullu piarai marlulissat sikutamit pissillutik nunamut nalussimanissaat ilimagineqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk