Nunavummi nannunniarneq aallartiinnaqaaq
Iqalunni piniartut kattuffiannit Amarumit nalunaarutigineqarpoq, uumasunik nujuartanik nakkutilliisoqarfimmit ukioq manna nannunik 41-nik pisassiisoqartoq, nannut angutivissat 32-it arnavissallu quligiluat pisarineqarsinnaallutik, taakkulu Davids Strædemi ukioq manna pisarineqarsinnaapput.
Ukioq manna nannut pisarineqarsinnaasut siornamut naleqqiullugit marloriaatigajammik amerlineqarsimapput, tassami siorna pisarineqarsinnaasut 23-usimagamik.
Iqalunni piniartut kattuffianni siulittaasoq, Joshua Kango, CBC News-mut oqarpoq, pisarineqarsinnaasut amerlinerisigut, ukioq manna nannunik piniarneq januaarip aallaqqaataani aallartissasoq. Nannunniarneq februaarip aallaqqaataani aatsaat aallartittaraluarpoq.
Nannunik taama amerlatigisunik ukioq manna pisassiineq peqquteqarpoq, ukiuni siuliini allani, nannut arnavissat pisarineqarsinnaasut naammatsikkaangata nannunniarneq unitsinneqartarmat.
Aamma ukioq manna taama pisoqarsinnaasoq, Iqalunni piniartut kattuffianni siulittaasup, Joshua Kangoop oqaatigaa, tassami nannut arnavissat pisarineqarsinnaasut naammatikkaangata piniarneq unitsinneqartarmat, tamannalu ataqqineqartartoq siulittaasup oqaatigaa.
