Nunavummi naalakkersuisut siulittaasortaarput
Nunavummi Naalakkersuisut siulittaasussaattut piukkoortut katillutik pingasuugaluarput, maannali toqqaasoqareerluni. Toqqarneqartoq tassaavoq Peter Taptuna. Nunavummi parteeqanngilaq, Nunavummilu Inatsisartut siulittaasussartik taasissutigisarpaat.
Peter Taptuna, Canadap Issittortaani kitaamiuneersuuvoq, illoqarfeeqqamit Qorlortuminngaanneersuulluni. Qorlortoq 1450-inik innuttaqarpoq. Peter Taptuna 58-inik ukioqarpoq, nuliaqarpoq, tallimanillu meeraqarluni.
Taptuna, najugaqarfigisami politikkikkut suliaqarnermik misilittagaqartuuvoq, namminersortunilu suliffeqarnermik misilittagaqarluni. Beaufort Havetimi, tassa Ualerngup Tarajuani uuliasiornermik, gassuimillu qalluinermik suliaqarsimavoq, soorlu aamma Qorlortup ungasinngigisaani Lupinimi kuultimik piiaanermik suliaqarsimasoq.
Peter Taptuna aqutsinermut tunngasunik Nunavummi Arctic College-imi ilinniagaqartuuvoq.
Nunavummi Inatsisartunut 2008-mi qinersisoqarmat siullerpaamik qinigaavoq, aningaasarsiornermillu ineriartortitsinermut, aatsitassaqarnermullu qinigaaffimmi kingullermi naalakkersuisuusimalluni. Tassunga atatillugu Nunavummi Naalakkersuisut siulittaasuata tulliatut aamma inissisimanikuulluni.
Nunavummi Inatsisartuni kikkut Taptuna qinerneraat isertugaavoq, taassumalli CBC Newsimut kingorna oqaatigaa naalakkersuisut siulittaasuattut suliassanik pingasunik pingaartitaqartoq, tassa Nunavummi meeqqat atuarfiini meeqqat ilinniartitaanerup qaffassarneqarnissaa, Nunavummi meeqqat atuarfianni atuartitaanerup Canadap sinneranut sanilliunneqarsinnaanngornissaa, soorlu aamma Nunavummi aningaasarsiornerup pitsanngorsarneqarnissaa sulissutiginiaraa, Nunavummilu inissaqarniarneq pitsanngorsarniarlugu.
