Nunavummi inuktitut oqaatsit nukittorsarniarlugit aningaassaliisoqaqqittoq
Canadami nunap inoqqaavisa oqaasii navianartorsiorput, ilaallu atorneqarunnaarsinnaallutik.
Naggueqatigiit inuit ajornartorsiuummut arajutsisimanngillat, oqaatsitillu atorneqaannartinniarlugit suliniuterpassuarnik aallartitsipput.
Maannalu ikiorneqalerput. Canadammi naalakkersuisuisa Nunavummi oqaatsit Inuktitut qajannaallisarnissaannut 78 millionit koruuninik aningaasaleeqqillutik tallimanngormat nalunaarutigaat. Tassalu naalakkersuisut aningaasaliissutigeriikkamik saniatigut aningaasaliipput.
Tamatuma saniatigut eqqillit Inuvialuillu Nordvest-territoriamiittut oqaasiisa patajaallisarnissaannut 96 millionit koruunit atorneqassapput.
Inuialuit, Issittup kippasissortaaniittut, oqaatsitigut annaasaqareerput. Illoqarfiilli radioqarfissaannik, oqaatsit pillugit paasissutissiisarfiusussanik ilinniartitsiffiusartussanillu pilersitsinissamut maanna aningaasanik tunineqarput.
Inuktitut oqaatsit Canadami oqaatsini navianartorsiunnginnerpaajupput. Nunavulli naalakkersuisuisa oqaatsit pillugit pisortatigoortumik inatsisini piumasaqaataat, tassalu inatsisartut oqallinneranni eqqartuussivinnilu allagaatini Inuktitut atorneqarnissaannut piumasaqaataat, naammassineqassappat, taava ilinniartitsissutit suliniutillu nutaat atorfissaqartinneqarput.
Aamma Inuktitut oqalulluni ilinniartitsineq Inuktitullu oqaatsit ilinniartitsissutigineqarnissaat oqaatsit illersorneqarnissaannut inatsit, The Inuit Language Protection Act, naapertorlugu ulluinnarni inuussutissarsiornermilu Inuktitut oqaatsit atorneqarnissaat aamma piumasaqaatigineqarpoq. Nunavut Inuktitut oqaatsit atorlugit ingerlanneqarnissaa inatsisip siunertaraa.
Inuktitut oqaatsit oqaatsini atorneqaannartussaasutut naatsorsuutigineqartuni pingasuni ilaapput. Taakkunanilu sinneri marluk tassaapput Cree aamma Mohawk. Eqqillit oqaaserpassui maanna atorneqarunnaareerput, oqaasiillu amerlanerit iliuuseqarujussuartoqanngippat ukiuni qulini tullerni atorunnaarneqarsinnaallutik.
