Nunavummi ilaqutariit tammaaneqartut ajunngitsut nassaarineqarput

Ilaqutariit taakku angerlarsimaffitsik, Rankin Inlet-ip avannaata kitaaniittoq, sisamanngormat kingullermik qimappaat, qamuteralannik angalaarniarlutik, meeqqatillu qamutinut ikillugit kalinniarlugit. Illoqarfimmut Hall Beackimut, angerlarsimaffimminniit 200 kilometerinik ungasitsigisumiittumut, arfininngormat apuuttussaasimagaluarput, anngutinngitsoorlutilli.

Canadami sakkutuut ujaasilerput, ilaqutariillu ippassaani sisamanngormat kiisami sumiissusersineqarput.

Ilaqutariit ittuat oqaluttuarpoq kukkullutik sangusimallutik, taamaammat tammartajaalersimallutik, aamma qamuteralaat aserorsimavoq. Unnuakkut qiianaqisumi tupertarlutik imminnut attuutivillutik uunnassimaartarsinnaasimapput, puisip orsua iluaqutsiullugu ikumatitsisarsinnaasimapput, meeqqallu qamutiniitillugit ullororaangat ingerlaartarsinnaasimapput, illoqarfik ornitartik Hall Beach ujamisaartarlugu.

Ilaqutariit nassaarineqaramik qulimiguulimmik Hall Beachiliaanneqarput, Canadamilu oqartussaasut ilisimatitsipput tamarmik ajunngitsut.