Nunavummi arnaq naartusoq nualluummik toqquteqarpoq

Nunavummi peqqinnissaqarfiup, ataasinngormat nalunaarutigaa, arnaq Nunavummiu, sapaatip-akunnerata siuliani Influenza A-mik napparsimalluni toqquteqartoq, naartusuusoq. Canadami tv-qarfissuarmit CBC-imit nittartakkakkut ataasinngormat allaaserineqarpoq.
Allattoq Oline I. Olsen
juulip 22-at 2009 05:48

Inuit H1N1-imik influenzartut naartunerminni ajornatorsiuteqalersartut, tv-qarfissuup allaaseraa, paasissutissalli annerusumik tunngavilersornagit.

Paasissutissat nappaateqartunut, uninngasunulluunniit allanut tunngassuteqartut nalinginnaasumik isertuunneqartaraluarput, peqqinnissaqarfiulli pisortaata Isaac Sobolip, paasissutissat napparsimasumut tunngassuteqartut pillugit ilaqutaasut isumasioreerlugit ataasinngormat saqqummiuppai:

- Inuit anigorsinnaanngisaminnik nappaatillit naartusulluunniit, influenza A-millu nappaateqalersorisut, piaarnerpaamik katsorsartinnissartik pillugu peqqinnissaqarfimmut saaffiginnittassapput, Isaac Sobol oqarpoq.

Influenza A-mik nappaateqalersorinermi akunnerit 48-t ingerlareertinnagit peqqinnissaqarfimmut saaffiginninnissaq pingaaruteqartoq, taassuma oqaatigaa.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq