Nunavummi aatsitassarsiornermik suliniut nunatsinni piniarnermut periarfissalutsitsisinnaasoq
Nunavimmi aatsitassarsiornermi suliniut saviminissamik assartuinissamut nunarput sarsullugu imaatigut ingerlaarfiliorusuppoq.
Pilersaarutip avatangiisinut sunniutigisinnaasai maanna nalilersorneqaleruttorput. Avatangiisinut pinngortitamullu naalakkersuisoqarfik suliniummut aamma oqaaseqaasiorpoq.
Aatsitassarsiorfiup tunisassiani marloriaatinngortikkusuppai, taamaaliussappallu umiarsuit amerlanerusut saviminissamik assartuilissapput.
Tamannalu Namminersorlutik Oqartussani avatangiisinut pinngortitamullu naalakkersuisoqarfiup ernumanartoqartikkaa, Nunatsiaq News allappoq.
Imaatigut aqqummut assiliartaq avatangiisinut pinngortitamullu naalakkersuisoqarfiup oqaaseqaataanneersuuvoq.
Qertertumik titarneq imaatigut aqqutaavoq.
Titarnerit qalipaateqartut imarmiut ukiuunerani sumiiffigisartagaraat aqqutigisartagaralugillu.
Qilalukkat qernertanut qorsuk, arfivinnut qorsuk qaamasoq aarrinullu aappaluttoq,
Qilalukkanut qaqortanut qalipaat qernertoq atorneqarpoq, pissutigalugu taakku ukiuunerani nunatta kitaaniittarmata, aammali ukiuunerata avataani sumiiffiup avataani ingerlaartarlutik.
- Ataatsimut isigalugu Mary Riverimi savimissamik assartuineq Issittumi imarmiunut miluumasunut aarlerinarnerpaasutut isigineqartariaqarpoq – minnerunngitsumik avanangiisit pissusiannut uterteqqinnissaannut periarfissakinnera oqaluttuarisaanermi takuneqareermat, avatangiisinut pinngortitamullu naalakkersuisoqarfik suliniutip avatangiisinut naliliinissanut oqaaseqaammi allappoq.
Uuliakoorsinnaanerup, arfernik aporsisinnaanerup ingerlaarfimmilu ajutoorsinnanerup saniatigut aatstsitassarsiorfimmiit umiarsuarnut nutamik aqqusiinikkut Kalaallit Nunaannut sunniuteqartussanik marlunnik ajornartorsiuteqarpoq.
Tamanna oqaaseqaammi KNR-ip pissarsiarisaani allassimavoq.
Ajornartorsiutip aappaa tassaavoq umiarsualivik usilersorfik, Eclipse Sound qeqertaasami Milne Inletimiimmat.
Qilalukkat qernertat nipinut malussaringaatsiartuusut, nunarsuatsinniittut 10 procentiisa missaat tassaniipput.
- Ajornartorsiutip aapparaa, Kalaallit Nunaata kitaatigut sikunik maniilarsuarnik aserorterinerup umiarsiaqarneratalu puisit arferillu assigiinngitsut arlallit ukiukkut tamaaniittartut sunnernerlussammatigit, Avatangiisinut Pinngortitamullu Naalakkersuisoqarfik oqaaseqaammi allappoq.
Aatsitassarsiorfik, Baffinland Iron Mines Corporation Mary Riverimi suliniumminik marloriaatinngortitsiniartuuvoq.
Suliffeqarfik saviminissamik ukiumut 6 millionit tonsit tikillugit piiaanissamut maanna akuersissutaateqarpoq.
