Nunavumiut maligassiuipput
Nunavumi Iqalunni kommunalbestyrelsemi ilaasortat sapaatip akunnerata naanerani aalajangerput, kommunalbestyrelsemi ilaasortat tarnikkut timikkullu, sakkortuumik inoqatiminnut iliuuseqarsimagunik, kommunalbestyrelseminngaanniit ingerlaannartumik tunuartinneqartalissasut.
Ilaasortat tamarmik siunnersuummut isumaqataapput, taamaasillunilu illoqarfiup siuttui innuttaminnut maligassiusunngorput. Taama nutaarsiassaqartitsivik CBC news allappoq.
- Sakkortuuliortarnerit ajornartorsiutaaqisut aaqqinniarnerini, taamatut alloriarneq pitsaasuuvoq, sakkortuumillu pissuseqartarneq kommunalbestyrelsemi ilaasortaasugut tamarmiulluta akuersaanngikkipput innuttaasunut takutipparput, kommunalbestyrelsemi ilaasortaq, Glen Williams oqarpoq.
Aamma illoqarfiup borgmesteria Elisapee Sheutiapik aalajangernermut nuannaarutiginnittoq isumaqataavoq;
- Neriuppunga illoqarfiit allat taamatut aalajangernitsinnut malinnaassasut. Inoqatinummi sakkortuuliortarneq akuersaarneqarsinnaanngilaq, Elisapee Sheutiapik oqarpoq.
