Nunavumi umiarsuarnut takornariartaatinut nutaamik pilersaarusiortut
Pilersaarut juunimili saqqummersinneqarpoq naalakkersuisoqarfiummi ilisimammagu Nunavup imartaani angallatit takornariallu amerlinissaat.
Takornariartaassuarni angallatinilu allani ilaasut ukiuni kingullerni qulini ukiumut tusindiniit 3500-nut amerlisimapput. Umiarsuit takornariartaatit 2005-imi aqqaniliusimapput 2015-imilu 40-simallutik ukioq mannalu suli amerlanerunissaat ilimagineqarpoq.
Pilersaarut The Nunavut Marine Tourism Management Plan 2016-2019 takornariaqarneq eqqarsaatigalugu arlalinnik anguniangaqarpoq.
Nunarqarfiit takornariarfigineqarsinnaanerat ineriartortinneqassaaq. Nunaqarfiit takornariat pillugit atuakkanik nutaanik najoqqutassanik takornariaqarnermillu paasissutissanik imalinnik ikiorsiivigineqassapput.
Anguniagassaq alla tassaavoq nunaqarfinni tunisassianik nutaanik ineriartortitsineq, assassukkanik kiffartuussissutinillu takornariat nunamukarpata ikiorsiissutaasinnaasunik.
Anguniakkallu pingaarnersarigunagaat tassaavoq umiarsuaatillit, umiarsuit nunaqarfiillu akornanni attaveqatigiinnerup pitsanngorsaavigineqarnissaa.
Nunavumi naalakkersuisoqarfiup taassuma imaatigut takornariaqarneq tassaasoraa siunissami aningaasatigut iluanaarniarfissaq pingaaruteqartoq.
