Nunavumi tuberkulosi atugaaqaaq

Nunavumi Kalaallit Nunaannisulli pualluut tuberkolose atugaaqaaq. Canada tamaat ataatsimut isigalugu Nunavumi tuberkolosertut amerlanerupput – aamma Nunavimmiunut sanilliullugit.
Allattoq Louise M. Kleemann
aggustip 15-at 2008 10:22

Innuttaasut pissakinnerit nunaqarfeeqqani arlaqaqisuni najugaqarnerat sulisullu paarlakaannerujussuat minnerunngitsumillu inuttut ajornartorsiutit atugaanerujussuat pissutaallutik nappaatip ajornartorsiutaanera akioruminaatsoq, Nunavumi nappaatit pillugit siunnersuisartup, Elaine Randell-ip oqaatigaa.

Nunavumi tuberkolosemik nappaatillit Canadap sinneranut sanilliullugit 2006-imi 30-riaammik amerlanerupput.

Nunavumi inunngortut tamarmik akiuutissamik kapineqartarput ilinniartullu misissugarineqarlutik.

Nunavimmi nappaammut akiuiniarneq iluatsinneruvoq, tassa tamaani Canadap sinneratut tuberkolosemik nappaateqartut ikitsigilersimapput, naak Nunavimmi Nunavumisuulli inuttut ajornartorsiuteqartoqaraluartoq. Peqqinnissamut ministerip oqaasii naapertorlugit tamanna akiuiniutinik kapuuinermik misissuinerillu ataqatigiissaarneqarnerannik peqquteqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq