Nunavumi talittarfiit amingaatigineqarput
Nunavup aningaasarsiornerata pitsaanngitsumik ingerlanera umiarsuarnut talittarfissaaleqinermik patsiseqarpoq. Taama Canada-mi naalakkersuisut misissuisitsineranni nalunaarusiaq inerniliivoq.
Suinnersuutigineqarporlu, talittarfinnik Pond Inlet-imi Iqalunnilu sanaartornissap saniatigut Nunavup sineriaani talittarfinnik anginngitsunik arlalinnik sanaartortoqassasoq.
Talittarfinnik arfineq marlunnik sanaartortoqarpat, Nunavummi suliffissaaleqineq sisamaraarterummik appartinneqassasoq aamma ilimagineqarpoq. Ilaatigut takornariaqarneq pitsanngorsaavigineqassasoq ilimagineqarpoq, aammalu aalisarnermik inuussutissarsiornerup pitsaanerusumik ingerlalernissaa ilimagineqarluni. Nunavumi raajat pisarineqartartut ullumikkut Kalaallit Nunaannut New Foundland-imulluunniit assartorneqartarput.
Canada-mi aalisarnermut pisortaqarfik, Department of Fisheries and Oceans, talittarfinnik arfineq marlunnik sanasoqarnissaanik siunnersuuteqaraluartoq, aningaasaliisoqarnissaanik neriorsuisoqanngitsoq, aviisi National Post allappoq.
Talittarfiit arfineq-marluk sanaartorneqassappata 200 million koruuninik akeqassapput. Talittarfiit 1240-t Canadami naalakkersuisut maannakkut ingerlataraat. Nunavummili talittarfinnik ingerlataqanngillat.
