Nunavumi oqaatsit marluk atorlugit atuartitsisoqalissaaq

Nunavumi ilinniartitaanermut naalakkersuisup Ed Picco-p siunnersuutigaa ukioq 2019 tikitsinnagu oqaatsit marluk atorlugit ilinniartitsineq Nunavumi eqqunneqarsimassasoq. Maannakkut 4. klassi tikillugu Inuktitut taamaallaat ilinniartitsisoqartarpoq. Misissueqqammernerup takutippaa Inuktituinnaq ilinniartitsisarnerup kinguneranik meeqqat atuarfiani amerlavallaat naggataarutaasumik soraarummeerusunneq ajortut.

Siunnersuummi neriorsuutigineqarpoq meeqqat ilikkarumaataartartut immikkut ikiorserneqatalissasut, klassimi atuartut ikilissasut atuarfinnilu tamani siunnersortimik atorfinitsitsisoqassasoq.

Ilinniartitaanermut naalakkersuisoq Ed Picco pisarnermik amerlanerusunik atuartitaanermut aningaasaliinissi piareersimaffigaa. Ilinniartitsisulli kattuffiat isumaqarpoq siunnersuut piviusorsiunngitsoq ilinniartitsisut ilinniartitsissutillu amingaataavallaarmata. Ilinniartitsisut kattuffiata tikkuarpaa oqaatsit marluk atorlugit Nunavumi ilinniartitsisoqartalissappat ilinniartitsisut ikinnerpaamik 200-t pissarsiarineqaqqaartariaqartut. – Aamma puigussanngilarput oqaatsit marluk atorlugit ilinniartitsisinnaasut siulliit soraarninngornissaat ungasikkunnaareernikuummat, oqarpoq Jimmy Jacquard, Nunavut Teachers Associationimi siulittaasuusoq. Taanna aamma oqarpoq ilinniartitsisut akissarsiaat ineqartitaanerallu pitsanngortinneqanngippata, ilinniartitsisut allami suliffissarsiornissartik orniginerujumaaraat aamma ilimagisariaqartoq.