Nunavumi nannut ukiuni kingullerni amerlatsissimanerannik Nunavumi innuttaasut oqaluttarnerat, ilisimatuup canadamiup – naalakkersuisunit atorfinitsitap – tamaatut inuit oqarnerat tapersersulerpaa.
Biologi taanna, Mitch Taylor aviisimut Washington Postimut oqarpoq: ”Inuit ilumoorput – nannut amerlerialaaginnarsimanngillat, amerleriangaatsiarsimappulli”, Mitch Taylor oqarpoq.
Piniartut maluginiagaannut tapersersuinissaminnut Canadami biologit tunuarsimaarsimaqaat – pingaartumik nannut nungutaalernerinik amerikamiut maanna eqqartuingaatsiarnerisa nalaanni.
Maannali killormut saakkunarpoq. Canadamiu aviisiliortoq, Don Martin, naapertorlugu, nannut kingullermik kisinneqarmata takuneqarsinnaasimavoq, Canadap issittortaani nannut 2.100 –sut – 1980-ikkut qiteqqunneranni 800-t missaanniiginnarsimallutik.
- Tusatsiakkat taamaammat ingasattajaaqisut oqarsinnaavugut. Aap, siku nungukkiartorpoq, silaannarlu allanngoriartorpoq, ajornartorsiulli imaaleriataarsinnaavoq, sikoqanngippallaarata immaqa nanoqarpallaalissaagut, Don Martin oqarpoq.