Nunavumi naalakkersuisut piitsuuneq akiornialerpaat

Nunavumi inissaaleqineqinerup, ilaqutariit iluini annersaasarnerup ilinniarsimannginnerullu saniatigut piitsuuneq ajornartorsiutaavoq.

Ajornartorsiut anigorniarlugu innuttaasut tamarmik ikioqatigiittariaqartut Nunavumi aningaasaqarnerup ineriartortinneqarnera pillugu naalakkersuisup, Peter Taptunap, oqaatigaa. Taamaammat Nunavumi innuttaasut isumaat maanna tusarniaaffigineqalerput, piitsuuneq innuttaasut qanoq paasisarneraat qanorlu iliuuseqarfigineqarsinnaanersoq tamatumani paasiniarneqassalluni.

Tamanna pillugu ataatsimiinnerit siulliit novemberimi aallartissapput ukiorlu tamaat ataatsimiittoqartassaaq. Ataatsimeeqattaarnerit naammassippata piitsuuneq pillugu nalunaarusiortoqassaaq. Upernaaru ataatsimiinnissanut sisamanut, nalunaarusiaq taanna aallaaviussaaq ukiaqqippallu Iqalunni ataatsimiinnersuaqassaaq.

Tamatuma kingorna Nunavumi piitsuunerup akiornissaa pillugu suleriaasissamik naalakkersuisut sananissartik naatsorsuutigaat.