Nunavumi arnarpassuit angerlarsimaffeerussinnaapput

Nunavumi arnarpassuit angerlarsimaffeerussinnaanermut navianartorsiortarput.

Arnarpassuit angerlarsimafimminni ajornartorsiuteqarnertik, imaluunniit napparsimalerneq, suliffeerunnerlu pissutigalugit angerlarsimaffeerussimasut arnat siunnersuisoqatigiiffiannik misissuiffigineqarsimapput.

Nunavumi illoqarfiisa pingaarnersaanni arnat 150-it angerlarsimaffeqanngitsutut inuupput. Arnat taakku ilaat majuartarfeqarfinni matoqqasuni, biilini, qanigisaminni ikinngutiminniluunniit ullut tamaasa oqqiffissarsiortariaqartarput, allallu angutinik ilaqartarput unnuamut siniffissaqarumallutik.

Arnat ilaat inissaqarumallutik aappaminnut persuttaasartunut utertarsimapput, tassami Iqalunni illutaarniaraanni initaarniaraannilu ukiorpassuarni utaqqisoqartarmat, Nunatsiaq Newsimi allaaserineqarpoq.

Iqalunni angutinut inissaaleqisunut ikiuniaqatigiiffik 20-nik siniffilimmik unnuisarfeqarpoq, arnanulli taama aaqqiisoqarnikuunngitsoq Arnanut siunnersuisoqatigiiffik, Qulliit Women Counsel, tikkuaavoq.