Nunavumi aatsitassanik piiaaneq sinneqartooruteqarfiusoq
Nunavumi Meadowbank piiaavik, Nunavummi piiaaviit kisiartarigallagaat, kiisami sinneqartooruteqarfigineqalerpoq.
apriilip 14-at 2013 09:41
Medowbankimi piiaavik, kuultisiorfiusoq, Hudsonip Kangerliumarngata kitaani Kivallimmi Baker Lakep (Qamani´tuaq) eqqannguaniippoq. Piiaavik ukiualunni annertuumik amigartooruteqarfiusarsimalluni 2012-imi iluanaaruteqarfiulluarpoq.
Inuit 200-t sinnerlugit, taakkununnga ilaallutik arnat 70-it, piiaavimmi suliffinnut assigiinngitsunut pikkorissarneqarsimapput tassanilu aalajangersimasumik atorfeqarlutik maanna sulisuullutik. Tamarmik Kivalliup pigisaaneersuupput.
Agnico-Eagle, Meadowbankimi piiavimmik piginnittuusoq Inuit suli amerlanerusut ilinniartinneqarnissaannik anguniagaqarpoq, suliffeqarfiup Rankin Inletip (Kangirliniq) eqqaani piiaavimmik allamik ammaanissani neriuutigisimagamiuk.
