Nunavimmiut uranisiornissaq naaggaarpaat

Uranisiortoqalissappat Nunavimmi unammilligassat ajornartorsiutillu  ataatsimiinnermi eqqartorneqarput. Tamanna pillugu nunaqarfinni arlalinni tusarniaanerit annikitsut aamma ingerlanneqareersimapput.
 
Makiviup siulittaasuata Jobie Tukkiapikip oqaatigaa nunap immikkoortuani uranisiornissamik ineriartortitsisoqarnissaa Nunavimmi naggueqatigiit Inuit akornanni akueriumaneqanngitsoq.
 
- Urani qinngornernik ulorianartunik akoqarpoq uumasunullu ajoqusiisinnaalluni, aammattaaq innuttaasut ileqquusumik nerisartakkaminnik nerisaqarunnaarnerannik kinguneqaratarsinnaavoq.
 
- Kingunipiluit uagut oqartarnitsitut ...nungujuittuq... tassalu qaqugumorsuarmut pijujuartussaassallutik, Jobie Tukkiapik oqarpoq.
 
Makivik nunap immikkoortuani Kativimmi naalakkersuisut peqatigalugit uranimik piianissaq pillugu BAPE-p tusarniaasitsinera tamaat malittarisimavaa. Tusarniaanermi paasinarsivoq uranisiornermut tamatumalu kingunerisartagai pillugit paasissutissat amigartut teknikkimullu tunngasortai pitsaasuunngitsut, Jobie Tukkiapik oqarpoq.
 
- Nunavimmi uranisiorneq maanna ingerlanneqartoq tunngavigalugu sukumiisumik misissueqqissaarnerit aammalu nunatta qanoq atornissaanik piniarnermullu tunngatillugu pingaartitavut tunngavigalugit isummerpugut, Maggie Emudluk, nunap immikkoortuani Kativimmi naalakkersuisut siuttuat oqarpoq.
 
- Nunavik avinngarusimasumiippoq silallu pissusia sakkortulluni, taamaammat naalakkersuisut assigiinngitsut uranisiornermik nakkutilliiniarnissaat ajornakusoortupilussuussaaq aammalu ajutoortoqassagaluarpat annaassiniarnermik aallartitsinissaq ajornakusuussalluni, Maggie Emudluk oqarpoq.
 
Taamaammat uranisiornissaq Nunaviup tungaanit erseqqissumik naaggaarneqassasoq isumaqatigiissutaavoq.