Nunavimmiut qangatut qitornavissiartaartarnerup akuerineqarnissaa kissaatigigaat
Nunavimmimi qitornavissiartaarnerit tallimaagaangaata ataaseq qangatut pisarpoq, tassalu meeraq ilaqutaasumit qitornavissiartaarineqartarluni.
Tamannalu ammasumik pisortatiguunngitsumilli pisarmat, meeqqat taakku qitornavissiartaarineqartunut allanut naleqqiullugit allaanerusunik pisinnaatitaaffeqartarput.
Tamannali Quebecimi inatsisartuni inatsisissatut siunnersuutigineqartukkut maanna allanngortinniarneqalerpoq. Inatsisissatullu siunnersuutigineqartoq akuersissutigineqassappat pisortatiguunngitsumik qitornavissiartaarineqartartut inatsisitigut akuerineqalissapput.
Tamannalu meeqqanut pingaarpoq, ilaquttaminnut atassuteqarnerannuinnaanngitsoq, aammali inatsimmut tunngaviusumut, nunap inatsisaanut, Nunavimmi isumaqatigiissutinut aalajangersakkanullu tunngatillugu pisinnaatitaaffigisaannut.
Nunavimmi peqqinnissaqarfiup siulittaasuata Elisapi Uitangaap tusagassiortunut oqaatigaa naggueqatigiit inuit ileqquusumik qitornavissiartaartarnerisa akuerineqarneratigut Inuit periaasitoqaat tunngavigalugit ingerlatsinermut alloriarnerussasoq pingaartoq, taamaaliornikkummi Nunavimmiut piginnaatitsissummik pingaarutilimmik tunineqassammata.
Inatsisissatut siunnersuutip Bill 113-ip upernaaru akuersissutigineqarnissaa naatsorsuutigineqarpoq.