Nunavimmiut nuannattut
Nunavimmiummi nunamut piginnittuutitaanerminnut isumaqatigiissut, the James Bay and Northern Quebec Agreement, atsiorneraniit, sapaatip akunnerani matumani ukiut 40-nngortorsiorpaat.
Nunaviup ineriartorneranut isumaqatigiissut pingaaruteqarsimaqaaq.
Ilaatigut Makivik Coporation, aningaasaqarnermut politikikkullu Nunavimmiut soqutigisaannik aallussisoq, tunngavilerneqarpoq.
- Ukiunik 40-nngortorsiornerput nunamut piginnittuutitaanermut isumaqatigiissutip qanoq pingaartigineranik qanorlu pisoqarsimaneranik eqqaasitsissutitut atussavarput. Isumaqatigiissutilli ulluinnatsinnut qanoq sunniisimanera, siunissatsinnullu qanoq isumaqarnera, eqqarsaatigissallugu pingaarneruvoq, Makiviup pisortaa, Jobie Tukkiapik oqarpoq.
Nunavimmiut arlallit, isumaqatiginninniarnermut peqataasimasut, Kuujjuarmi nalliuttorsiornermut peqataapput. Nalliuttorsiornermi filmiliaq piviusulersaarut isumaqatigiissutip isumaqatigiinniassutigineranut taamanilu inunnut peqataasunut tunngasoq takutinneqarpoq.
Filmi Nunavimmi inoqarfinni tamani takutinneqassaaq, isumaqatatigiissuttaaq innuttaasut inuunerannik allanngortitsisoq, inoqarfinni tamani nalliuttorsiutigineqarpoq.
The James Bay and Northern Quebec Agreement Canadami naggueqatigiit inuit nunamut piginnittuutitaanerannut isumaqatigiissutini siulliuvoq.
