Nunavimmiut meerartaat atugarliorput
Inuusuttut Nunavimmeersut ikiorneqarnissartik pisariaqartittorujussuuaat. Quebecimi innuttaasut pisinnaatitaaffii pillugit ataatsimiititaliarsuup nalunaarusiaani saqqummiunneqaqqammersumi tamanna atuarneqarsinnaavoq.
- Meerarpassuit tarnimikkut, timimikkut kinguaassiuutitigullu atornerlugaapput, naallu inuusukkaluarlutik imigassartornermik aanngajaarniutinillu allanik ajornartorsiuteqarajuttarput, ajornartorsiutillu tarnikkut timikkullu napparsimalersitsinnaapput. Nalunaarusiami Nunavik-mi illoqarfiit pingaarnersaanni Kuujjuarmi sapaatip akunnerata siuliani saqqummiunneqartumi, 82-inillu quppernilimmi tamanna atuarneqarsinnaavoq.
Quebec-ip ministeriunera Jean Charest, inuusuttunut ministeriutigisoq, inuusuttut pillugit suliniummut nammineerluni ilannguttariaqarnera ujartorneqarpoq.
Nunavik-mi inunnik isumaginnittoqarfik pitsaanerusinnaagaluarpoq. Inuusuttut pisinnaatitaaffiiagaasutut ullumikkut nalilerneqarsinnaapput, tassa aningaasanik ikiorsiissutinik pisinnaarpianngillat inissaqarniarnikkullu ajornartorsiuteqarlutik. Aamma ilinniagaqarnermikkut ajornartorsiuteqartut nalunaarusiami allaaserineqarpoq.
Quebec-imi nunaqavissut ministeriat Benoit Pelletier oqarpoq nalunaarusiami saqqummersut tupannaqisut akuersaarneqarsinnaanngilluinnartut. Ataatsimiititaliap aaqqiissutissatut siunnersuutai ilumoorullugit malinneqartariaqartut oqarpoq, suliniaqatigiiffiillu assigiinngitsut suliassamut akuunerulernissaat aamma ujartorlugu.
Suliassaq naammassineqassappat suliniaqatigiiffiit soorlu Tulattavik aamma Inuulitsivik aningaasalersorneqartariaqarput. Suliniaqatigiiffiit taakku peqqinnissaqarfiup suliassaasa ilaannik tigumminnipput, iluamilli sulisssagunik aningaasalersorneqartariaqartut, siuttuata Jeannie May-ip Nunatsiaq News-imut oqaatigaa.
Pitsanngorsaanissaq pillugu Quebec-imi innuttaasut pillugit ataatsimiititaliarsuaq katillugit 21-nik siunnersuuteqarpoq akisussaaffiulli annertunersaa angajoqqaanit tigummineqartoq oqaatigineqarpoq.
Nunavik 12.000-ngajannik innuttaqarpoq.
