Nunavimminnut angerlartinneqassanngillat

Nunani allamiut arfineq-marluk, Yemenimi parnaarussaaqqasut – ataatsimik danskertallit – musliiminut peqqarniisaarnianut ilaasortaanerarlugit eqqartuussassanngortinneqassapput.

Aamma nunavimminnut angerlartinneqassanngitsut, Yemenimi oqartussaasut aalajangiisimapput.

Nunami pissutsinut ministeri ualeq taama nalunaaruteqarpoq. Aamma nutaarsiassaqartitsiviit naapertorlugit, atorfillit ilaat oqarsimanerarneqarpoq, taakku arfineq-marluk nassuersimasut, somaliamiunut peqqarniisaarniartartunut musliimiusunut sakkunik isertortukkut eqqussuisimallutik, aamma peqqarniisaarniarluni saassussinissanut aningaasanik katersuiniartarsimallutik.

Inuusuttut arfineq-marluusut taakku tassaapput danskeq 23-nik ukiulik, australiamiut pingasut, tuluk ataaseq, somaliamiu ataaseq kiisalu sumiuunera ilisimaneqanngitsoq ataaseq. Taakku tamarmik musliimiupput, ilartik danskeq assigalugu qanittukkut musliiminngorsimasut.

Nutaarsiassaqartitsivik Associated Press allappoq, parnaarussaasut taakkua ilaat arlallit al-Qaedap Yemenimi suleqatigiiffianut attuumassuteqarlutik nassuersimasut.

Danskip nuliatalu, aamma qanittukkut musliiminngorsimasup, erneratalu sisamanik ukiullip, angerlarsimaffianni pappilissat isertortut al-Qaeda-meersut, aningaasallu eurot dollarsillu tuusintilikkaat, nassaarineqarsimasut oqaatigineqarpoq.

Danskeq musliiminngorsimasullu allat Yemenimi universitetimi ilinniartuupput. Universiteti taanna USAmit Osama bin Ladenimut tapersersuisuunerarneqarpoq, peqqarniisaarnianillu ilinniartitsisarneragaalluni.

Yemenip præsidentianit oqaatigineqarpoq, nunani allamiut taakku koranip universitetiani ilinniartuunnginnerarlugit, universitetilu peqqarniisaarnianik ilinniartitsineq ajornerarlugu.

al-Qaeda Yemenimi immikkoortortaqarpoq, oqaatigineqarporlu Osama bin Laden Yemenimi inunngortuunerarlugu.

Maannalu apeqqutaalerpoq, danskeq ilinniaqataalu ajortumik siunertaqarnatik korani ilisimatusarneraat, imaluunniit sorsunnermut illernartumut ilaanersut.